Svörtu Tungurnar

Askur Yggdrasils er íslenskt spunaspil (hlutverkaspil) eftir bræðurna Rúnar Þór Þórarinsson og Jón Helga Þórarinsson sem kom út árið 1994. Spilið byggir sögu Íslands og heiðinni trú, en spilararnir taka að sér ýmis konar hlutverk í goðsagnakenndri útgáfu af norrænum fornaldarsögum.Spilakassinn sem Svörtu tungurnar bjóða fram, í samstarfi við Davíð Ingva Snorrason, er í fullkomnu ástandi, algjörlega ónotaður og hvorki sér á spilakassanum, bókunum eða öðrum fylgihlutum.
Á spilinu segir:
„Askur Yggdrasils er spil þar sem þú ræður atburðarásinni algjörlega og ekkert setur þér takmörk nema ímyndunarafl þitt og spilafélaga þinna. Hefur þig alltaf langað til að vera ríkur, sterkur, fallegur, gáfaður, göldróttur … eða fátækur ræfill, ljótur, heimskur og hæfileikalaus? Í spunaspili geturðu látið allar óskir þínar rætast.
Hver spilahópur mótar spilið og lagar það að sínum þörfum og þess vegna eru engin aldursmörk – allir geta spilað Ask Yggdrasils.
Askur Yggdrasils er að margra dómi eitt fullkomnasta spunaspil sem samið hefur verið.
Í kassanum er allt sem þarf til að setjast niður og byrja að spila: Leikmannabók, spunameistarabók með spennandi ævintýri, skjáir fyrir spunameistara, teningar og persónublöð.“
Allur ágóði rennur til Mottumars-átaks Krabbameinsfélagsins.

Askur Yggdrasils

Svörtu tungurnar blása til uppboðs til styrktar Mottumars. Við byrjum á að bjóða upp eintak af ónotuðum Aski Yggdrasils í fullkomnu ástandi í samvinnu við Davíð Inga Snorrason eiganda spilsins, en í framhaldi af því verða fleiri munir boðnir upp til styrktar baráttunnar gegn krabbameini.
Svörtu tungurnar eru skipaðar tíu spunaspilurum sem tóku sig til fyrir tveimur árum og stofnuðu hlaðvarpsþátt um áhugamálið. Hlustendahópur þáttarins hefur vaxið verulega undanfarið en auk þess að fjalla almennt um spunaspil hefur hópurinn tekið upp lifandi setur þar sem spunastjórnandi stýrir sögu með spilurunum, beint í eyru hlustenda.
Hópurinn samanstendur af Birni Stefánssyni leikara og trommara, Hirti Jóhanni Jónssyni leikara, Hannesi Óla Ágústssyni leikara, Ólafi Agli Egilssyni leikara og leikstjóra, Snæbirni Ragnarssyni sköpunarstjóra á auglýsingastofunni Pipar\TBWA og meðlimi Skálmaldar og Ljótu hálfvitanna, Hilmi Jenssyni leikara, Tryggva Gunnarssyni leikara og leikstjóra, Bjarna Hjartarsyni bílahönnuði, Hlyni Páli Pálssyni samskiptastjóra og Lúðvík Snæ Hermannssyni hugbúnaðarsérfræðingi og eilífðarspunaspilastjórnanda.